(1912) ¡¡El Diañu los Micóbrios!!

ESCENA I

LIN: Ya vien isi home. Par Dios
tó les pelleyes frayáes
d'aguardar ¡Cuánta cachacia!
Cuerri, home, cuerri p' alantre.
XICO: Non puedo más. Topé á Lliro
pel camín, quixo falame
de la Pinta, y vó vendéila
erga Dios. Non quiero vaques
de raza nos miós peselbes.
Son cudiones, folgazanes,
dan llechi delgao, y amás,
puestes al xubu, son blandies.
LIN: Pero son bones.
XICO: Tal cual.
LIN: Y además d'eso son guapes.
XICO: Tal cual tamien. Unde ta
capa y el bon pelaxe
d' una xata del país,
que non té muerta de fame,
que té de verde, y amás,
i apurran de postre dáries
una ocena de panoyes
d' á forcu, que vengan races
á dar llechi, á tener cuadru
y á pesar llibres de carne.
LIN: Tu tiénesla 'borrecía
pe la multa que ti charen.
XICO: Si par Dios. Y xuro á Cristo,
ha pagámilo 'l alcalde.
Pero non vamos agora
á tratar d' isti percance.
Vamos ver 'l asuntu tuyu
y el de Tuxa, recarape;
que vaes á facevos vieyos
galantiando. Hay que casase...,
ó dexá 'l sitiu pa utru
si non convien.
LIN: Bones ganes
tengo yo d' echar muyer.
XICO: ¿Non ho? Pos echa les zanques
caleya abaxo, y non güelvas
á picar á les ventanes.
Non quiero allumar candiles
pa que se divierta naide
nin tener moces que sirvan
pa mofla de los vergantes.
LIN: Pero Xico...
XICO: ¡Ha ser asina,
xuro á Dios! O vos casaes
o mi la dexes en paz,
y abasta ya de palabres...
Obres quiero to. Non cuntes
que porque se i morrió 'l padre
va ser mofla tuya, ¡soño!
nin de cuatro matapanes
q' anden per hi noche y día
chando la montera 'l aire.
LIN: Home, hay que dir conociéndose...
XICO: Mira, pónesmi la sangre
de llargatu. ¿Conociéndose?
¿Y fai siete años cabales
en isti pe les cereces,
xuro á tal, que la galanties?
LIN: Pero, home...
XICO: ¿Quiés conocela tovía miyor?
LIN: Sí.
XICO: Pos cásate.
Y atendi q' anque ta güérfana
non cuntes que non tien náide
que i faga arrimu.
LIN: Pa min
no i fexo falta.
XICO: ¡Quién sabe!
LIN: Selo yo, y sábelo ella.
XICO: Pos non abonda: que 'l diantre
anda sueltu y les muyeres...
Dios nos llibre... Ya lo sabes.
Yo só mansu como un burru
que fasta dexo amontame,
y vo tranquil co la carga
que 'nriba 'l llumbu mi charen.
Pero ¡erga Dios!... si amás d'eso
han querer arreventame
tiro coces, y apilanco...
y érgome sobre les pates
y muerdo... y vó de ramal
lo mesmo que si llevaren
un gatu pel rau.
LIN: Ta bono.
XICO: Tuxa ha venir al estante
de la villa, y aquí mesmo,
á la sombra d'istos árboles,
á la vera d'istes seves,
has tener, Lin, qu' esplicate
y sengañala, y decíi,
si vas dexala, qué faltes
tien hoy la moza, que non
pudisti atopáiles antes.
LIN: Home, non digo...
XICO: ¡Babayu!
La miyor neña del valle,
la de más tienres querencies,
la de más dolces palabres;
que la so voz ye la música
con que s' alegren les almes;
que la suya ye más tienra...
que los besinos que manden
á los neñinos que durmen
del mesmu cielo los ánxeles
Si tu yes más ricu guárdalo,
que non ti lo lleve naide,
y dexa la neña güérfana
y sola, y cuerri á 'nfangate
und' atopes más cebera
y menos corazón.
LIN: Vae:
¿díxiti yo nunca, Xico,
que tuviera Tuxa faltes?
¿Que me quixés moflar d' ella
porque ta sola 'n sin padres?
¿Que non ye bona, y que val
ella, probe, 'n sin guilate,
muncho más q' angunes moces
que tienen miles de riales?
XICO: Non por ciertu.
LIN: ¿Y non ti dixi
q' habia deficultaes
pa la boda?
XICO: ¿Cuáles son?
LIN: Que non me quier.
XICO: ¡Muerra 'l diantre!
Ye mentira. Quierte y préciate
muncho más de lo que vales.
LIN: Ya lo verás.
XICO: Pos verémoslo
aquí mesmo 'n cuantu acabe
d' allegar. Vó á casa Pin
á ver si i compro dos vaques.
LIN: Ta bono. pero isa multa
que se ruxe que ti charen
¿foy verdá?
XICO: Non fora tantu.
LIN: Diz que la llechi...
XICO: ¿Qué saben
nin entienden, de ganau
de llechi, isos matapanes
de la villa? Saben todos,
y Lin, tú, tamien lo sabes,
que les vaques holandeses
dan llechi como agua, y ¡arre
que i lo che yo!
LIN: Diz que taba delgao.
XICO: Que lo 'ngordaren
LIN: Q' amarga
XICO: Que i echen zúquere
LIN: Que ta soso.
XICO: Que lo salen.
¡Erga Dios si la tal multa
no ha resquemai al alcalde!
LIN: Diz que tenia 'l micóbriu...
XICO: ¿Y si ellos i lu apiegaren?...
¡Qué si yo, Lin, qué si yo
como tará de fregase
aquel diañu de cañotu
que ti meten enes xarres
y nos tariegos de llechi!
¡Y quién sabe, Lin, quién sabe
non traya 'l micóbriu illi
mesmu, ansina Dios me salve!
¡Como tan ellos tan frescos...!
¡Que ximielguen unes manes
que, to pa xurar, que nunca
en so vida les llavaren!
¡Y, xuro á tal: vi un fulanu
con unes oreyes tales,
q' aquí ti fago una apuesta...
que, par Dios, pa esinfetáiles...
ha ser pocu la brigada
sanitaria, muerra 'l diantre!
LIN: Pero entós ye cierto...
XICO: ¡Bono!...
Ya mi lo noteficáren;
pero pagar non pagué
tovía.
LIN: Ta bonu 'l trance
XICO: Cuntará isi tal homin
que non más que con peñase
los raos del bigote, y char
multes á les aldeanes
ya tá tou fecho. Veremos.
¡Xuro á tal! Pierdo les barbes
ó tó saber si hay xosticia
y si hay cabeza, barájoles.
¿Fácesmi una apuesta?
LIN: ¿Qué?
XICO: ¿A que non quema les Cases
del Parrochu, que asemeyen
mas cobiles d'animales
que sitios de vevir xente?
LIN: Pos illi ofreció ciarrales.
XICO: A que nón les ciarra. Apuéstoti...
una faniega de fabes.
LIN: Dicen tamien que 'l micóbriu...
XICO: Que lu atopen enes agües
¿nordá?
LIN: Sí. Nes de Llantones
y per tudes les fontanes.
XICO: Tán frescos. Modu y manera
de quemái á un la sangre.
Si fos verdá, nes aldées
non caberin les cadarmes.
LIN: Ah, pos non mi digas, Xicos
q' hay poques enfermedaes.
XICO: ¡Pero non son del micóbriu!
LIN: ¿Pos de qué son?
XICO: Apiegades.
¡Diañu d'homin! N' u quixiera
yo veles amontonaes,
regolviendo calentures...
¡bien lo sabe Dios, carape!
LIN: Isi micóbriu ¿qué ye?
XICO: ¡Qué ye! ¿Inda non lo sabes?
LIN: Non pardiez.
XICO: Pos... Yo tampocu;
pero puedes enterate
de la mió muyer.
LIN ¡Qué! ¡Sábelo!
XICO: Siempre que escuelle les fabes
pal pote, amira... y asopla...
pa non lu char en potaxe.
LIN: Pero 'ntóncenes ¿ye un llixu?...
XICO: Ye... N' atopo comparances...
Ye... vamos...
LIN: ¿Como un pioyín?
XICO: Sí. Non puede columbrase...
LIN: ¿Y come?
XICO: Les asadures.
LIN: Pámeque...
XICO: Si yo pudiés
coller un par d' embozaes
y, al homin que yo dixera,
metéiles debaxo 'l chape...
LIN: ¿Quién vien ahi?
XICO: Será Tuxa.
Puedes falái dos palabres
mentres tantu que vó yo
á ca de Pepin del Chantre.
Y lo de la multa déxalo;
que vo yo á dir, Dios mediante,
á la villa, pe la causa
de la suegra d' isi traste
de Toribu, que quier chala
pa un de los hespitales
q' hay nuevos, y na Cruz Roxa
tó con Fausto Alvergonzale
que lo entiendo bien, y cunto
que podrá desengañame.
LIN: ¿Qué yer allí?
XICO: Ye 'l sacretariu.
LIN: No has de tardar.
XICO: Güelvo a 'scape.

ESCENA II

LIN: Pos tien so razón Xico.
Son abondo bastantes
pa galantiar siete años
una moza, y casase;
pero ella non da priesa,
yo non sé qué palabres
y to dicer... Y á veces,
que les tengo enfiláes
pa cháiles nes oreyes...
empapiello al cuntáiles,
y muerro de vergüenza
ansina Dios me salve.
Ahí vien. Miyor sitiu
pa poder explicase
non lu habrá pel conceyu;
non mos estorba naide,
no hay más que les caleyes,
les seves y los árboles...
y quiciais dalgun páxaru
blincando pe les rames
y llamándomi burru.
¡Qué vo facer! En cuantes
que la vego á mió vera
reblíncami la sangre
y fáloi... de tarrones
y de cucho y de vaques,
de tou, menos 'l astuntu
per más enteresante.

ESCENA III

LIN: ¡Alto aquí!
TUXA: Bonos díes.
LIN: ¡Quieta!
TUXA: ¿Qué, vas piegame?
LIN: Tengo orden de que non te dexe dir pa lantre.
TUXA: ¡Y quién ti la dió?
LIN: Xico,
que dixo que esperares,
mentantu qu' illi amiya
de ca Pepin del Chantre.
Con que asina descansa
y espera.
TUXA: Non m' engañes.
LIN: Non t' engaño, mió Tuxa;
dixo que güelve a 'scape.
¿D' ú vienes?
TUXA: De la villa.
LIN: ¿Tan ceo? Madrugaste.
¿Y qué tal?
TUXA: Guapamente.
LIN: ¿Tas per continta?
TUXA: Miániques.
Vengo de la Cruz Roxa.
LIN: ¡Qué señorito fales!
TUXA: Permuncho.
LIN: Daque visti
que ti abriría les ganes
de comer.
TUXA: ¿Tas de groma?
LIN: Non muncho. Vas cuntame
ises coses que visti
per allá, q' han ser guapes
de lo que tas d' alegre.
TUXA: Pos bono: no aplipayes
y atendi, vo cuntátilo
d' afecho en dos palabres.
LIN: Diles, mió Tuxa, diles,
q' han ser, pe lo melades,
más dolces que 'l marmullu
que facen les fontanes.
TUXA: Pos verás... Y quixera,
Dios mesmu bien lo sabe,
quixera pa decítilo
tener llingüina d' ánxeles;
que fos la voz pertienra
y miel virxen y algaire
el arruxindu trémbole
de tudu mió fablaxe.
LIN: Tas poniéndote triste.
TUXA: Tarelo yo quiciaves.
Porque 'n isa Cruz Roxa
deprendí, coses tales,
que, mialma, non acierto
á escurrir, al cuntátiles
si tó entamar con rises
ó tó entamar con llárimes;
q' alli atópase xente
que tien ñobles entrañes
y corazón pal probe
y amor pa les disgracies,
enfotu nos peligros,
valor enos combates
y, al fin, cuando la güestia
sobro la tierra esparde
la muerte y el espantu
per campos y ciodaes,
y cayen los valientes
y fuxen los cobardes
y non hay... un amparu
que pueda prestar naide,
apaezse isa xente
que lleva nos brazales
la Cruz Roxa, 'n sin miedu,
sereña como 'l mármole,
co la fe de los santos,
col valor de los mártiles
á coller los sospiros
del enfeliz que caye.
LIN: Verdá ye... y al cuntalo
pos... dasmi pena miániques.
TUXA: Desque entamó la peste
entamárenmi ganes
de dar yo mió limosna,
que non podía ser grande,
non, porque falten fuerces
si asobren voluntades;
y fuy, y entré na Cátedra,
y dixi á los guardianes:
-Aquí ta la llechera
de Xove. - ¿Pos qué traye?
-Pos trai una limosna:
díganmi á quien ha dase
-Pos á la Tesorera.
-¿Quién ye?- Pase p'alantre.
Buscaba yo á Pacita
Menendi, q' á so padre
tratolu muncho 'l miu,
y querémonos miániques
muy d' adientro Pacita
y yo, dende rapaces;
pero non pudi vela
nin á les otres dames,
Pilar, Anita, Ulogia,
tan bones, tan amables,
que tantu se molieren,
y tantu s' afanaren
por ser de los probinos
el pañu de les llárimes.
LIN: Sí que son bones. Anda
y cúntalo pa lantre.
TUXA: Y entré per una sala
que mi paez más grande
y llonga que la mesma
iglesia de Tremañes.
Taba la tesorera
con un vieyin amable,
un señorín que..., vamos,
al velu yo delantre...
bono... non se que lleva
escribiu en caráute
que fíxome amiralu
en sin querelo miániques,
con afleutu perdolce
con querencia pergrande
por una bondosura
que 'n tudu illi resplandie
tantu como la ñeve
de sos honroses canes.
Si vieres tu qué vénia
mi fexo al saludame.
Y eso que manda 'n todos
segun mi lo cuntaren.
LIN: Paezse al mayorazu
que tenemos en valle;
que si lu atopa unu
pasiando nes quintanes
y posa la montera
pa dai les bones tardes
nin arrespuende, el puercu,
nin amira pa naide
y henchípase lo mesmo
q' una vexiga d' aire.
TUXA: Yo non los conocía...
di les bones mañanes
y entós, la tesorera...
que cayí 'n ella miániques,
y tu tamien...
LIN: ¡Sí!
TUXA: Viémosla
pasiar dangunes tardes
per Xove...
LIN: ¡Quién devina!
TUXA: Verdá que ve una tantes pasiar...
LIN: Dami les señes.
TUXA: Si debes d' acordate:...
de güeyos llistos, guapa,
delgada, fina, áxile;...
como la mesma pólvara
d' espabilada. ¿Cayes?
LIN: Manolina, la fía
de Canella Secades,
que 'n ser como 'l rellámpagu...
seméyase á so padre...
TUXA: Direti que la sala
amás de llonga y grande
como ti dixi, xuro
que puede comparase
con una casa 'n unde
cosieren venti xastres.
LIN: ¡Deveres!
TUXA: N' una mesa,
pieces de teles blanques,
en utra, teles prietes
y un' esquirpia de caxes
de botones; pa un llau
un en sin fin de máquines
de coser y carretes,
tiseres y dedales
y, en fin, la mar de coses
de cordura.
LIN: ¡Carape!
TUXA: ¡Y 'l almacen!
LIN: ¡Cuál!
TUXA: Vamos:
el Roperu, qu i llamen,
en unde tan les prendes
de vistir que se manden
pa poner los enfermos
q' hay enos hespitales...
L' acabose. Paezti...
una tienda del aire
en día de mercau.
LIN: ¡Sí mialma!
TUXA: Allí despachen
a modo de tenderos
caballeros y dames.
D. Cándido, chalecos,
y Felisina, faldes;
y D. José la Torra
llibres de chicolate
Verás: tamien buscaba
les neñes de Solares
y de Beltran ¿Quiés crelo?
Pos non pudi topales,
pos corren co les cuentes
y vienen pe la tarde.
LIN: Tu fusti de mañana
y... claru que non taben.
TUXA: Cunado ya diva dime
na mesma sala entraren
ansi como un' ocena
de señorites... guapes
lo mesmo que claveles
q' acaben de pelase;...
alegres como roses
q' á l' alborada 'sparden
les pelres d' orbeyada
que nes corones traen
LIN: ¡Ye de veres!
TUXA: ¡Sí mialma!
Yeren lo mesmo q' ánxeles;
unes daqué más neñes,
utres daqué más grandes;
unes daqué más roxes,
utres daqué más blanques;...
pero toes, á tema,
feches d' apuesta maxes,
finses como 'l serpollu
que brota nos rosales...
y más fines de cutre
y de miyor carnaxe...
que si foren sobrines
de cura, así me salve
Dios.
LIN: ¡Daría gustu veles!
TUXA: ¡Y lluigo al preparase!..
Sabuyeten los hábitos,
'sengüelven les gufandes
y posen los sombreros
y esvisten los gabanes
y prienden los mandiles
de modu que ios cuadre
so la mesma pechuga,
nunde 'l corazón llate,
una cruz collorada
como la mesma sangre;
que ye 'l color benditu
q' á 'les mexelles castes
asoma de les neñes,
al oyer alloriades
el primer xuramentu
d' amor de sos galanes.
LIN: ¡Ma que daría bon gustu
velo! ¿Dempués que faen?
TUXA: ¿Qué faen? Pos asiéntense:
unes xunta les máquines,
utres xunta les meses,
nes sielles, nos sofases...
Y entós goza una viendo
aquelles nidies manes
co les sortielles d' oru
y piedres de diamantes,
q' al llucir enes xoyes
allúmenios nes cares,
correr pe la cordura
enabuyando á 'scape.
LIN: Pero vamos al cuentu:
¿entós pa quién trabayen?
TUXA: Pa los probes enfermos
que tan nos hespitales.
LIN: ¿Y cuántu cobren?
TUXA: Nada.
Elles todo lo facen
por Dios y pe los probes.
LIN: Pos que Dios ios lo pague.
TUXA: Cuerri tu, ve dir veles;
que mialma han de gustate.
Y lleva pa los probes
siquiera venti riales,
que tu tiéneslos.
LIN: Dízmilo
con esa boca d' anxel...
¿Hay ocasión más bona
pa dicei dos palabres?
¿Por qué ha dami vergüenza
si non lo 'scucha naide?
¡Tuxa!
TUXA: ¡Qué!...
LIN: Ven... más cerque...
TUXA: Más cerque.
LIN: Vo 'ntrugate...
una cosina
TUXA: Bono...
Pos dila...
LIN: ¿A que non sabes...
qué ha parir la nubiella
que tien Pepin del Chantre!
TUXA: (Ta bono...)
LIN: Taba visto
¡habrá rocin mas grande!
Entamé mal. Pos xuro
q'hoy mesmo tó franquiame...
¡Tuxa!...
TUXA: ¡Qué!
LIN: Ven... más cerque
TUXA: Más cerque...
LIN: ¿Arreparaste
lo q' agüel ista fueya?
TUXA: ¿De qué ye?
LIN: D' ises plantes
de poleu... Pero agüeli.
TUXA: Agüeli tu.
LIN: Carape,
¿pos cuntes que t' engaño?
El arume qu' esparde
diz que da fuelgu á 'l alma
y q' alegra la sangre.
TUXA: Pos púrrimi un goliatu.
LIN: Pos échalu per grande.
TUXA: ¡Qué rico yé!
LIN: Sí.
TUXA: Tómala.
LIN: Non: déxala nes manes
q' ha ser como una ofierta
que, de xuro, ti faen
el corazón y 'l alma...

ESCENA IV

XICO: ¡Con que hay... deficultaes!...
Con que ha ser una ofierta!
Vamos: les arrecades
¡Ven!
LIN: ¡Qué...!
XICO: ¡Andando!
LIN: Yo...
XICO: ¡Andando!
¡Tu aguardes!
TUXA: Yo...
XICO: ¡Tu aguardes!
LIN: ¿Fixemos da que malo?
XICO: Pa que non lo fagaes.

ESCENA V

TUXA: Dichosa fueyiquina
que 'n ámbetu repartes
el delicadu arume
de to ramina fráxile!
¡Bendita siá la tierra
homilde nunde naces
y les perles d'orbayu
que dende'l cielo cayen
á esfreceti les flores
de to graciosu cálice!
¡Que la vida mi diste...!
Que 'l alma mi aliviaste...!
¡Bendia siás florina...!
¡Juasús!... ¡Ahí ta 'l diantre!

ESCENA VI

TORIBU: Bonos díes.
TUXA: Bonos, chachu.
¿Cómo ta to suegra?
TORIBU: Mala.
TUXA: Eso ye lo pior
TORIBU: ¿Q' ha selo?
Lo pior ye que non acaba...
y n' atopo quien l' atienda
y yo vo rindiendo, mialma.
Ya non puedo rindir más...
TUXA: ¡Probe! Pidi á Dios cachacia,
Toribu.
TORIBU: Ya, ya i la pido.
Y co lo pocu que manda
paez que dó en barruntar
que 'l mesmu Dios ta 'cabándola.
TUXA: Home, non tal.
TORIBU: Va tres meses
semana sobro semana
que la tengo dando coces
y berríos ena cama,
y yo esfágome de pena
y d' escomiciones...
TUXA: Vaya
¿por qué ho?
TORIBU: Por que non muerre
d' una vez.
TUXA: Calla, home, calla.
Non digas eso.
TORIBU: ¡Vergayu!
Non tas mieu. Que fora llástima
que morriés
TUXA: ¡Si ye tan bona!...
TORIBU: Siempre lo foy.
TUXA: ¡Tan homana!
TORIBU: Sí, permuncho. Vo cuntati,
por si non lo sabes, chacha,
y anque lo sepias, lo mesmo,
lo que pa min foy la cáñama
de mió suegra. ¿Conocisti
la mió muyer?
TUXA: Home, Xuana.
TORIBU: La fía d'ella. Una mocina...
TUXA: Sí por ciertu: rescamplada.
TORIBU: Pos un día... compré un quesu
d' afuega 'l pitu pa Xuana.
Non foi gustu de mió suegra...
y arrecebomi la cara
con illi; y agolí á quesu
cási que media semana.
Utra vez compré un... ¿oyístilo?...
metilu baxo la cama...
violu mió suegra... agarrolu...
y en sin decimi palabra...
cascómilu na cabeza,
y dempués echomi 'l asa
en un platu de fariñes.
Y ¡qué más! Sabi rapaza
que la noche de la boda,
que ye noche de folgancia
pa todos los que se casen,
foi pa min muncho mediana.
Nin me dexó divirtime,
nin tar cabo la rapaza,
y al postre, pa fin de fiesta
de tou, cuando yo cuntaba
estrenar cama de ñoviu,
en sin decimi palabra
chárense les dos en ella,
y yo durmí na tenada.
TUXA: ¡Ae María!
TORIBU: ¡Como hay Dios!
TUXA: Ta bono.
TORIBU: Si ye una santa.
TUXA: Pos mira. Non hay remediu:
ye una cruz, y hay que llevala
TORIBU: ¿Llevala? Pa un sumidóriu
nunde non paeza castra
nunca 'nxamás.
TUXA: Ah Toribu...
¿Non decín que díbes chala
pa 'l hespital?
TORIBU: De secuti.
Pes por eso vengo, mialma,
á ver á Xico; á metela
'n isi hespital que se llama
la Cruz Roxa. Ta na llomba d' arriba, que i llamen Santa Catalina.
TUXA: Bien pensasti.
Alli ta perbien.
TORIBU: ¿Barrúnteslo?
TUXA: Sí par Dios.
TORIBU: (Si acasu sana
cuando ande de convalencia,
á ver si quiciáis esbarria
per un resguilu d'aquellos
y va de cabeza 'l agua)
¡Con que ta perbien!
TUXA: De xuro.
Ta muncho miyor que 'n casa.
Verás. En cuantes que llegue
esvístenla; y cuantu traya
so los güesos, va pal jueu.
TORIBU: Eso, eso ¡y ella!...
TUXA: A la cama.
TORIBU: (Llástima non la zamparen
en jueu tamien.)
TUXA: ¡Pero cata
qué cama! Como pa un rey.
TORIBU: ¿Si ho?...
TUXA: Tien colchón de llana
y unos sábanos tan frescos
q' arrecienden á colada.
TORIBU: Non como los que se estilen
ena aldea, de mediana,
que i esfuellen la pelleya
al enfermu.
TUXA: Son malhaya
finos como pelu d' anxel,
llimpios como ñeve blanca.
¡Y pa comer y curase!...
Vamos 'l acabose. Mándala
y tate tranquil, q' ha tar
miyor que 'n una posada
de cuatro pesetes daries...
TORIBU: ¿Si ho?
TUXA: Sí
TORIBU: (¡Quién la pillara!)
(Quixera ser yo 'l enfermu.)
¿Tardaran muncho 'n curalla?
TUXA: N' home non. En quince díes
has tenela na quintana
llista como un reguilete
dando sos güeltes per casa
TORIBU: Entóncenes...
Non la mando.
TUXA: Pero...
TORIBU: Non la mando vaya
TUXA: ¿Por qué?
TORIBU: Porque yo quixera
que morriés, y van curámila.
TUXA: ¡Pero, home, no has de ser llucu!...
TORIBU: Llucu fora al ensiñala
á vevir de siñorita
'n un hespital. ¡Bona gana!
Depréndei á comer bien,
¿y dempués? Mira, rapaza:
yo cunté qu' isi hespital
yera ansi... como una casa
unde arrincái la pelleya
á tou más 'n una semana;
¿pero ansi? En casa tá bien,
y que muerra cuando y plaza.

ESCENA VII

XICO: Ansí se fay. Los pregones
á cas del cura mañana.
LIN: Quier dicise...
XICO: ¿Quier dicise...
que querés char utra estaya
de siete años galantiando?
LIN: Home...
XICO: ¿Disti una palabra?
¿Sï ó non?
LIN: Como dar... dila.
XICO: ¡Amírate!...
LIN: Pos... ta dada.
XICO: A ca 'l cura los pregones
entós, al riscar el alba.
¿Oyisti?... Nada ti digo.
Agora güeli la planta
q' agolís tantu... ¡Toribu!
TORIBU: ¡Q' hay!
XICO: Que ta 'rreglada
la custión del hespital
pa to suegra. Ye una llástima
tenela mal antendía.
TORIBU: Pero dizmi ista rapaza
que... Vamos, non mi convien,
non mi convien el llevala.
XICO: ¡Non convien! Ven acá, Tuxa...
Tenede puntu, caraña,
que tien q' asobravos tiempu...
¿Qué dixisti á istí sollastra,
del hespital?
TUXA: Pos que yera...
perbon.
XICO: ¿Entoncies?
TORIBU: Pos... Nada.
Que ye demasiao perbon
pa ella. Y 'n ella non manda
naide más que yo... y despongo
que quiero que muerra 'n casa.
¡Ay Lin, barrunto que tu
busques tamien la casaca!
LIN: Quiciaves.
TORIBU: ¡Qué suerte tienes que piesques isa rapaza,
una rapaza como isa...
y non lleves suegra!
XICO: ¡Vaya!
Quier dicise... de qué modu
va 'rreglase esto, caraña,
que vien ahí la Cruz Roxa
co la camilla á to casa
TORIBU: ¿Pero y quién la dunvia?
XICO: El nunciu.
Miaquí la orden q' acaba
de dami 'l pedañu.
TORIBU: Pero...
XICO: A ver. No hay más q' acatala.
y dir pa Xixón to suegra,
q' ha tar miyor que 'n to casa.
Ayeri fusti á la mía
á mandami q' arreglara
el metela 'n hespital;
fíxolo. Dunvié una carta
á D. Jesús de Menendi,
que foy acalde, y que manda
pemruncho allí, 'na Cruz Roxa,
y, por si non abastara,
dunvié utra á D. Sabinu
Acebal, que tien vara alta
allí, pos ye 'l tesoreru
cargu de abonda 'mportancia...
y que... ¡tien más enfluyenza
q' un cañónigu, caránia!
Inda más. Por si quiciaves
tou esto non abondara,
escribí á Doña Felipa
Alvergonzale, q' abasta
ella sola, pa facer,
'n un estante que se abran
todes les puertes y metan
'n hespital... la to quintana
con cases y tou. ¡Vergayu!
Si mi das una plantada,
xuro á Dios non ti 'smigayo
la cabeza. Vaya, vaya
qu' entre alcaldes y micóbrios
y tu ponédesmi un alma...
TORIBU: ¿Micóbrios dixisti? ¿'Nunde
atopás yo una 'mbozada
pa poneilos... á mió suegra...?
XICO: Na llechi de la mió vaca...
¡mata suegres!
TUXA y LIN: ¡La Cruz Roxa!

ESCENA VIII

SANITARIO: Saluda
XICO: Bien venidos.
SANT: Una carta.
de D.a Felipa.
XICO: ¿Vístilo,
Toribu?... Q' hay que llevátila
ye una romería... A ver
que mi diz.
TORIBU: ¡Una palabra!...
¿Oyisti?... Dovos un duru
si la entornáes 'n una cárcoba.
XICO: ¡Ñhora 'n tal!... mio Tuxa, Lin...
¡ta la multa perdonada!
¡D.a Felipa!... Si non
amecho jueu á la casa
del untamentu
TUXA: Entós, Xico,
la multa...
XICO: Pa ti, rapaza.
TUXA: Non, pa min non: pa los probes.
XICO: Pa la Cruz Roxa, naranxa.
Vamos dir acompañando
l' enferma; 'n acomodándola,
al xulgau monecipal.
¿Tu dístimi una palabra?
LIN: ¡Ta dicho!
XICO: Pos al xuzgau;
y en so día, como manda
Dios, á casar na parroquia.
Baxaremos pe la Cátedra
y daremos na Cruz Roxa
isa multa condenada
¡qu' iba zampami 'l alcalde!
A ti, vo dati la vaca
holandesa, que non quiero
tener más ganau de raza.
¿Tades conformes?
LIN: Conformes.
TORIBU: (Non yo)
XICO: ¿Tu?
TUXA: Non... digo nada.
XICO: ¡Qué vas dicer, si non puedes,
que ya se ti cai la baba!
¡Vamos!
¡A dir pe l' enferma!
TORIBU: ¿Y de veres... vaes llevámila...
en sin que muerra?...
XICO: Toribu...
¡ten resinación, caraña!

OBRAS DEL MISMO AUTOR

A l' Habama
Pinin 'l afrancesau
El curin
L' estudiante de Tueya
Sola mártil
L' hespiciana

EN PREPARACION

La cruz del camin rial.